Teg Wawriodd from LLOER by Brigyn

Teg wawriodd bore-ddydd na welwyd ei ail
Er cread y byd na thywyniad yr haul:
Bore gwaith a gofir yn gynnes ar gân,
Pan fo haul yn duo a daear ar dân.

Y testun llawenaf i’n moliant y sydd
Fe aned in Geidwad, do, gwawriodd y dydd,
Yn Geidwad i deimlo dros frodyr dan fraich,
Yn Grist i’n gwaredu, Un cadarn ei fraich

Edrychwn o’n hamgylch, pwy greodd y rhain:
Haul, lloer, sêr a daear sy’n gwenu mor gain?
Chwyrnellant drwy’r gwagle
ynghrog wrth ei Air,
Ac Yntau yn pwyso ar fynwes fwyn Mair.

Y Bachgen a anwyd yn rhychwant o hyd -
A Mab sydd â’i rychwant yn mesur y byd!
Yn faban bach egwan ar fronnau ei fam,
Ac eto yn cynnal y bydoedd heb nam!

Mewn gŵyl fawr dragwyddol sydd eto i ddod,
Moliannwn ein Ceidwad, datganwn ei glod,
Cydseiniwn “Hosanna” nes atsain y nen,
Rhown iddo ogoniant a moliant, Amen.

• Cymraeg
• Folk
• Folktronica
• Pop
• Welsh
• World
• United Kingdom